Viðtakandi: Nefndasvið Alþingis
Sendandi: Íris Róbertsdóttir, bæjarstjóri, f.h . bæjarráðs Vestmannaeyja
Dags. 8. október 2019
Efni: Umsögn um tillögu til þingsályktunar um óháða úttekt í Landeyjahöfn, mál nr. 84.
Bæjarráð fagnar því að tillaga um óháða úttekt á Landeyjahöfn hafi verið lögð fram aftur og að allir
þingmenn kjördæmisins taki undir með tillögunni.
Bæjarráð telur afar brýnt að ráðist verði í sérstaka úttekt á Landeyjahöfn til þess að meta til hvaða
aðgerða þurfi að grípa til að tryggja heilsárshöfn í Landeyjum. Varla þarf að árétta hvers konar
samgöngubót Landeyjahöfn er fyrir einstaklinga og fyrirtæki í Vestmannaeyjum og landsmenn alla.
Bæjarráð er sammála þeim spurningum sem úttektinni er ætlað að svara, en vill undirstrika mikilvægi
þess að úttektin nái til sem flestra þátta sem nauðsynlegir eru til að halda úti heilsárshöfn í
Landeyjum, þ.m .t; a) hvort lengja þurfi ytri og innri garðana eða bæta við hafnargörðum, b) setja
brimbrjóta utanvið hafnargarðana, c) meta hvaða kostir eru í stöðunni varðandi rifið, d) kanna hvaða
möguleikar eru á að bæta aðkomuna að höfninni og hafnarminninu, e) kanna hvernig samspil vinda
og sjólags kunni að hafa áhrif á nýtingu hafnarinnar.
Nauðsynlegt er að úttektinni fylgi tillögur til úrbóta um hvernig höfnin geti þjónað hlutverki
heilsárshafnar. Mikilvægt er að úttektaraðilar ráðfæri sig við þá aðila sem hafa hvað mestu reynslu af
því að sigla inn í höfnina.
Mikilvægt er að hafa eftirfarandi í huga í vinnu við úttektina:
1. Að fá upplýsingar frá erlendum dýpkunaraðilum, sem miðlað geta af reynslu sinni og komið
með hugmyndir um úrbætur. Er hér átt við aðila sem eru að vinna að sambærilegum
verkefnum og eru í Landeyjahöfn, þ.e. fyrirtæki sem hafa þekkingu, reynslu og aðgang að
besta hugsanlega tækjabúnaði sem til er.
2. Skoða þær hugmyndir sem fram hafa komið fram um bætta aðkomu að Landeyjahöfn.
3. Ráða reyndan og óháðan aðila til þess að vinna útektina.
Bæjarráð gengur út frá því að hin óháða úttekt einskorðist ekki við dýpi Landeyjahafnar og telur að
þeir þættir sem nefndir eru í umsöginni hér að ofan rúmist innan orðalags þingsályktunartillögunnar
eins og hún er sett fram núna.