VIÐSKIPTARÁÐ ÍSLANDS
SAMTÖK
ATVINNULÍFSINS
Nefndasvið Alþingis
Efnahags- og viðskiptanefnd
B.t. nefndarritara
Austurstræti 8-10
101 Reykjavík
Efni: Athugasemdir vegna minnisblaðs Samkeppniseftirlitsins 10. júní 2020
Viðskiptaráð Íslands og Samtök atvinnulífsins (samtökin) vilja koma á framfæri athugasemdum í tilefni
af minnisblaði Samkeppniseftirlitins til efnahags- og viðskiptanefndar dagsett 10. júní 2020. Í
minnisblaðinu er fjallað um fréttatilkynningu framkvæmdastjórnar Evrópusambandsins frá 2. júní sl.
og látið í veðri vaka að framkvæmdastjórn Evrópusambandsins ætli sér að innleiða íhlutunarheimild
sambærilega þeirri sem íslensku samkeppnislögin geyma. Í fyrirliggjandi frumvarpi um breytingar á
íslenskum samkeppnislögum er lagt til að heimildin verði afnumin.
Sé tilkynning Evrópusambandsins skoðuð nánar er þó ljóst að framkvæmdastjórnin hefur ekkert
ákveðið í þessum efnum, heldur einungis kynnt hugmynd um hugsanlega nýja heimild. Á þessu stigi vill
framkvæmdastjórnin „kanna þörfina á hugsanlegri nýrri heimild'' (e. exploring the need for a possible
new competition tool), líkt og það er orðað í fréttatilkynningunni og óskar eftir athugasemdum
almennings og helstu hagsmunaaðila vegna þeirra hugmynda sem uppi eru. Hugmyndirnar eiga því
eftir að fara í gegnum langt, víðtækt og mikilvægt samráðsferli og ekki er hægt að gera ráð fyrir því að
íhlutunarheimild, sambærileg þeirri og til staðar er í breskum rétti, verði innleidd í
samkeppnisregluverk Evrópusambandsins. Fjarri lagi er að ganga út frá því að slíkar hugmyndir verði
samþykktar og í raun má búast við því að þær mæti mikilli mótstöðu, ekki síst í ljósi þess um hve víðtækt
inngrip í starfsemi fyrirtækja er að ræða.
Íhlutunarheimildin í íslenskum samkeppnislögum er almennt orðuð og ákvæðið er mjög matskennt á
sama tíma og það felur í sér víðtæk inngrip sem líkur eru á að fari gegn eignarréttarákvæði íslensku
stjórnarskrárinnar. Þá er sú íhlutunarheimild er Samkeppniseftirlitið vísar ítrekað til, sem
samkeppniseftirlit Bretlands býr yfir, settar mun ítarlegri skorður.
Samtökin telja mikilvægt að íhlutunarheimild c-liðar 1. mgr. 16. gr. samkeppnislaga falli brott. Ekkert
samkeppniseftirlita annarra Norðurlanda býr yfir slíkri heimild, hún gengur gegn stjórnarskrárvörðum
eignarrétti skv. sérfræðingum á réttarsviðinu og þrátt fyrir að Samkeppniseftirlitið staðhæfi að til standi
að innleiða slíka heimild í evrópskan samkeppnisrétt er um að ræða hugmyndir á frumstigi en ekki
fastmótaðar áætlanir um mótaða íhlutunarheimild.
Virðingarfyllst,
Reykjavík, 16. júní 2020
f.h. Viðskiptaráðs f.h. Samtaka atvinnulífsins
https://ec.europa.eu/commission/presscorner/detail/en/ip_20_977