Lanctssamtöfíin
Þroskahjdlp
Mannréttindi fyrir ailaí
Umsögn Landssamtakanna Þroskahjálpar um frumvarp til laga um frumvarp til
laga um breytingu á lögum um almannatryggingar, nr. 100/2007 (hækkun
lífeyris), 6. mál.
Landssamtökin Þroskahjálp þakka fyrir að fá frumvarpið sent til umsagnar og vilja koma
eftirfarandi á framfæri við velferðarnefnd og Alþingi varðandi það.
Landssamtökin Þroskahjálp lýsa eindregnum stuðningu við frumvarpið og skora á
velferðarnefnd að beita sér fyrir því að það verði að lögum.
Sá hópur fólks sem býr við alverstu kjörin í íslensku samfélagi eru þeir sem engar tekjur hafa
aðrar en bætur frá Tryggingastofnun ríkisins. Þær bætur eru af óútskýrðum og órökstuddum
ástæðum umtalsvert lægri (um 30.000 kr.) en atvinnuleysisbætur, sem enginn er þó of sæll af.
Staðreyndin er hins vegar sú að atvinnuleysisbætur eru tímabundið ástand á meðan
örorkuþegar eru í þessari kröppu stöðu árum saman og margir allt sitt líf, án tækifæra til þess
að afla sér annarra tekna.
Örorkuþegar hafa ítrekað setið eftir á síðustu árum. Sú hækkun sem boðuð er í frumvarpi til
fjárlaga vegna ársins 2020 er langt undir hækkun lágmarkslauna. Því er óhjákvæmilegt að
minna ríkisstjórnina og Alþingi á 69. gr. laga nr. 100/2007, um almannatryggingar, sem hljóðar
svo:
Bætur almannatrygginga, svo og greiðslur skv. 63. gr. og fjárhæðir skv. 22. gr., skulu breytast
árlega í samræmi við fjárlög hverju sinni. Ákvörðun þeirra skal taka mið af launaþróun, þó
þannig að þær hækki aldrei minna en verðlag samkvæmt vísitölu neysluverðs. (Undirstr.
Þroskahj.).
Landssamtökin Þroskahjálp óska eindregið eftir að fá að koma á fund velferðarnefndar til að
gera betur grein fyrir sjónarmiðum sínum og áherslum varðandi frumvarpið.
Virðingarfyllst,
f.h. Landssamtakanna Þroskahjálpar,
Bryndís Snæbjörnsdóttir, formaður.
Árni Múli Jónasson, framkvæmdastjóri.