Nefndasvið Alþingis
nefndasvid@althingi.is
13. janúar 2020.
Vísað er í tölvupóst dags. 9. desember 2019 þar sem Velferðarnefnd Alþingis óskar eftir
umsögn um frumvarp til laga um breytingu á lögum um almannatryggingar, nr. 100/2007
(hálfur lífeyrir), 437. mál.
Tryggingastofnun hefur ekki efnislegar athugasemdir við frumvarpið en hefur athugasemdir
varðandi framkvæmdina verði lögin samþykkt.
Tryggingastofnun bendir á eftirfarandi:
Gera má ráð fyrir auknum fyrirspurnum varðandi hálfan ellilífeyri og að fleiri munu nýta sér
úrræðið eftir lagabreytinguna. Það mun hafa þau áhrif hjá Tryggingastofnun að meiri
mannafla þarf í svörun fyrirspurna, afgreiðslu umsókna og tekjueftirlit. Auk þess þarf að
breyta tölvukerfum.
Umsóknir um 50% ellilífeyri þarfnast meiri rannsóknarvinnu og leiðsagnar en almenn umsókn
við 67 ára aldur. Því er nauðsynlegt að upplýsa umsækjendur um áhrif þess að taka 50%
ellilífeyri. Jafnframt þarf að kalla eftir gögnum, t.a.m. launaseðlum eða staðfestingu frá
launagreiðanda til þess að sannreyna að um 50% starf sé að ræða.
Nauðsynlegt er að hafa sérstakt tekjueftirlit innan ársins þar sem sannreynt er hvort
viðkomandi sé í hálfu starfi. Það kallar á aukna vinnu hjá sérfræðingum og keyrslur í
tölvukerfum stofnunarinnar.
Áætlaður kostnaður við lagabreytinguna hjá Tryggingastofnun:
1. Forritunarvinna í tölvukerfum, einskiptis aðgerð, 5 milljónir króna. Felst í breytingu á
kerfum varðandi ný skilyrði við töku 50% ellilífeyris, t.a.m. takmörkun við 50%
starfshlutfall og útfærslu á vélrænu tekjueftirliti.
2. Árlegur umsýslukostnaður, 18 milljónir króna. Sérfræðingar í réttindum ellilífeyris,
tvö stöðugildi, sem er varanleg breyting vegna fleiri fyrirspurna, leiðsagnar, vinnu við
umsóknir og reglulegt tekjueftirlit.
Tryggingastofnun leggur einnig til að lögin öðlist gildi 1. janúar 2020 en komi til framkvæmda
1. maí 2020 til að gefa stofnuninni svigrúm til að innleiða breytinguna í tölvukerfi sín og ferla.
Tryggingastofnun
Sólveig Hjaltadóttir
framkvæmdastjóri Lífeyrissviðs
mailto:nefndasvid@althingi.is