Umsögn um frumvarp til breytinga á lögum um sérstakan skatt á fjármálafyrirtæki nr.155/2010, mál
nr. 4, 2019-2020
Samtök atvinnulífsins fagna áformum stjórnvalda um lækkun bankaskatts enda hafa þau ítrekað
hvatt stjórnvöld til að lækka sértæka skatta sem á fjármálafyrirtækin eru sett. Með frumvarpinu
eru áform um að lækka bankaskattinn í fjórum áföngum úr 0,376% í 0,145% á árunum 2021-2024.
Þrátt fyrir fyrirhugaða lækkun bankaskattsins verður sérstök skattlagning á íslensk
fjármálafyrirtæki rúmlega fimmföld á við önnur nágrannaríki sem yfirhöfuð setja á slíka skatta. Í
ljósi þessa hvetja SA stjórnvöld til að huga að hraðari og frekari lækkun bankaskattsins en
núverandi áform gera ráð fyrir.
Hagsm unam ál fy rir heim ili og fyrirtæ ki
Að mati SA er það hagsmunamál fyrir heimili og fyrirtæki í landinu að fjármálaþjónusta sé á
sanngjörnum kjörum. Auk þeirra almennu skatta sem lagðir eru á fyrirtæki í landinu greiða
fjármálafyrirtækin bankaskatt, almennan fjársýsluskatt af launum og sérstakan fjársýsluskatt af
hagnaði. Samanlagt er sérstök skattlagning á fjármálafyrirtækin átta sinnum meiri en þekkist í
nágrannaríkjum okkar og munar þar mestu um bankaskattinn. Sérskattar á fjármálafyrirtækin
skila árlega ríkissjóði 15 milljörðum króna í skatttekjur þar af eru tekjur af bankaskatti 10
milljarðar króna. Heimili og fyrirtæki greiða bankaskattinn í formi hærri útlánavaxta og lægri
innlánsvaxta. Lækkun bankaskattsins myndi því að öðru óbreyttu skila sér í hagstæðari
vaxtakjörum, auka ráðstöfunartekjur heimila og styðja við fjárfestingu, nýsköpun og milda þannig
áhrif niðursveiflunnar.
M ikilvæ gt að lækka bankaskattinn h raðar og meira
Þrátt fyrir boðaða lækkun verður bankaskatturinn áfram mun hærri en í þeim ríkjum sem
yfirhöfuð leggja á slíkan skatt. Mikilvægt er að stjórnvöld hugi að hraðari og frekari lækkun
bankaskattsins auk lækkun eða niðurfellingu annarra sértækra skatta á fjármálafyrirtæki. Í fyrsta
lagi myndi lækkun sértækra skatta skila sér í bættum vaxtakjörum til heimila og fyrirtækja. Í öðru
lagi kemur of íþyngjandi skattheimta verulega niður á samkeppnisstöðu íslenskra banka sem eru
bæði í samkeppni við erlenda banka, tæknifyrirtæki en einnig innlenda aðila sem veita
sambærilega þjónustu og bankarnir. Í þriðja lagi hefur íþyngjandi skattheimta áhrif á
söluverðmæti bankanna, en tveir af þremur viðskiptabönkum landsins eru í eigu ríkisins.
Til að setja sértæka skatta á Íslandi í samhengi við önnur ríki má nefna að í Danmörku eru sértæki
skattar og gjöld um 0,05% af meðalstöðu eigna. Á Íslandi eru samsvarandi skattar 0,55% af
meðalstöðu eigna og verða eftir fyrirhugaða lækkun 0,38% á árinu 2024.
Að lokum
Samtök atvinnulífsins hvetja stjórnvöld til að lækka bankaskattinn strax á næsta ári og skapa
svigrúm til að lækka skattinn hraðar og meira en núverandi áform gera ráð fyrir. Yrði það
mikilvægt framlag stjórnvalda til að milda áhrif niðursveiflunnar, styrkja rekstrarumhverfi
fyrirtækja og auka ráðstöfunartekjur heimila í formi hagstæðari vaxtakjara.
Virðingarfyllst,
Fyrir hönd Samtaka atvinnulífsins,
' r fe d iíj c ío S c l