SAF
Nefndasvið Alþingis
b.t. efnahags- og viðskiptanefndar
Austurstræti 8-10
101 Reykjavík
nefndasvid@althingi.is
Efni: Umsögn SAF - Samtaka ferðaþjónustunnar um frumvarp til laga um breytingu á
ýmsum lögum varðandi leyfisveitingar (einföldun regluverks).
Hinn 1. nóvember sl. lagði ferðamála-, iðnaðar- og nýsköpunarráðherra fram á Alþingi
frumvarp til laga til laga um breytingu á ýmsum lögum varðandi leyfisveitingar. Frumvarpinu
var vísað til efnahags- og viðskiptanefndar hinn 6. nóvember sl. og með tölvupósti, dags. 11.
nóvember sl., óskaði nefndin eftir umsögn SAF - Samtaka ferðaþjónustunnar um frumvarpið.
Beðist er velvirðingar á að umsögnin berst nefndinni að loknum umsagnarfresti.
Afstaða SAF - Samtaka ferðaþjónustunnar er sú að þau áform sem endurspeglast í frumvarpinu
séu í meginatriðum mjög jákvæð. Lýsa samtökin stuðningi við áform ferðamála-, iðnaðar- og
nýsköpunarráðherra um einföldun regluverks.
Að framangreindu sögðu komast SAF þó ekki hjá því að lýsa andstöðu við breytingar sem til
stendur að leggja til á ákvæðum IV. kafla laga um verslunaratvinnu, nr. 28/1998. Í kaflanum er
kveðið á um sölu notaðra ökutækja en í frumvarpinu er lagt til að löggilding bifreiðasala verði
afnumin.
Á vettvangi samtakanna hefur verið lýst verulegum áhyggjum af afnámi löggildingar
bifreiðasala enda telja mörg aðildarfyrirtækja samtakanna nauðsynlegt að traust ríki um
viðskipti með notuð ökutæki. Hafa verður í huga að veruleg verðmæti eru jafnan undir í slíkum
viðskiptum og getur óvissa og óöryggi bæði aukið umstang og viðskiptakostnað. Að mati
samtakanna er bæði kostum gildandi fyrirkomulags og helstu þáttum sem valdið geta óöryggi
lýst nokkuð vel í umsögn Bílgreinasambandsins og Félags íslenskra bifreiðaeigenda um
frumvarpið.
Samandregið fagna samtökin frumvarpinu og framtaki ráðherra við einföldun regluverks
en lýsa þó andstöðu við afnám löggildingar bifreiðasala.
Reykjavík, 3. desember 2019
F.h. SAF - Samtaka ferðaþjónustunnar
Benedikt S. Benediktsson
mailto:nefndasvid@althingi.is