BSRB
Nefndasvið Alþingis
Velferðarnefnd
Austurstræti 8 - 10
150 Reykjavík
Reykjavík, 4. desember 2019
Efni: Umsögn BSRB um frumvarp til laga um
Húsnæðis- og mannvirkjastofnun, 319. mál
BSRB hefur ekki fengið umsagnarbeiðni um frumvarp til laga um Húsnæðis- og
mannvirkjastofnun en óskar eftir því að meðfylgjandi umsögn bandalagsins verði tekin til
umfjöllunar hjá velferðarnefnd Alþingis. Frumvarpið felur í sér sameiningu Íbúðalánasjóðs og
Mannvirkjastofnunar, meðal annars með það að markmiði að efla stjórnsýslu, stefnumótun og
framkvæmd húsnæðis- og mannvirkjamála.
Með frumvarpinu er lagt til að núverandi verkefnum Íbúðalánasjóðs verði skipt upp, þannig að
sá hluti sjóðsins er snýr að útgáfu skuldabréfa, eldri lánastarfsemi og fjárstýringu eigna utan
lánasafns verði eftir í ÍL-sjóði en sett verði á fót ný stofnun sem fær þau verkefni sem nú eru
hjá Mannvirkjastofnun og þau verkefni Íbúðalánasjóðs sem verða ekki eftir í ÍL-sjóði. BSRB
styður efni frumvarpsins og telur það stuðla að auknum stöðugleika á húsnæðismarkaði og
skilvirkari stjórnsýslu.
BSRB átti fulltrúa í Átakshópi ríkisstjórnarinnar í húsnæðismálum, í tengslum við gerð
kjarasamninga, sem skilaði 40 tillögum að úrbótum í janúar 2019. Þar var meðal annars lagt
til að stjórnsýsla húsnæðismála yrði efld og yfirsýn húsnæðismarkaðar aukin. Þar var fjallað
um mikilvægi þess að húsnæðisáætlanir lægu fyrir til þess að meta megi íbúðarþörf, framboð
íbúða á markaði og í byggingu, framboð lóða o.s.frv. áður en framkvæmdir hefjast. Slík yfirsýn
er afar mikilvæg fyrir framkvæmdaaðila, sveitarfélög og einstaklinga. BSRB telur að með
frumvarpinu verði til öflugri stofnun á sviði húsnæðis- og mannvirkjamála sem er betur í stakk
búin til þess að vinna að því mikilvæga verkefni að hafa slíka yfirsýn.
BSRB er annar stofnaðili Bjargs íbúðafélags sem hefur að undanförnu unnið að mikilli
uppbyggingu leiguhúsnæðis hér á landi. BSRB fagnar af þeim sökum sérstaklega framlagðri
tillögu í h. lið 1. mgr. 19. gr. frumvarpsins þar sem segir að stjórn nýrrar stofnunar sé veitt það
hlutverk að ákvarða vexti HMS-verðbréfa með hliðsjón af markmiðum lánveitingar o.fl., en það
er afar mikilvægt að litið sé til slíkra þátta við vaxtaákvörðun, sér í lagi vegna lánveitingar til
aðila sem standa að uppbyggingu leiguhúsnæðis á félagslegum forsendum. Vaxtakostnaður
slíkra aðila vegur almennt þungt í leiguverði og lækkun fjármagnskostnaðar mun skila sér til
leigutaka í formi lægra leiguverðs.
Að lokum tekur BSRB undir þær athugasemdir sem koma fram í umsögn Landssambands
slökkviliðs- og sjúkraflutningamanna er snýr að brunavörnum og öryggi.
Fyrir hönd BSRB
W ---------- AA- 6 '-------
Hrannar Már Gunnarsson
lögfræðingur
GRETTISGÖTU 89 ID5 REYKJAVÍK SÍMI: 525 8300 BSRBiBSRB.IS BSRB.IS