149. Löggjafarþing 2018-2019
Þingskjal 88 - 88. mál
Umsögn vegna frumvarps til laga um breytingu á lögum um stimpilgjald, nr. 138/2013
(kaup einstaklings á íbúðarhúsnæði).
BæiarfuNtrúar Siálfstæðisflokksins í Vestmannaevium leggja fram eftirfarandi umsögn við
ofangreint frumvarp til laga:
Bæjarfulltrúar Sjálfstæðisflokksins fagna framlögðu frumvarpi um afnám stimpilgjalda vegna
kaupa einstaklinga á íbúðarhúsnæði.
Æskilegt væri að samhliða þessari tillögu að breytingu á lögum um stimpilgjöld væri bætt við
frumvarpið ákvæði sem lýtur að afnámi stimpilgjalda er varða eignaryfirfærslu skipa. Áður hafa
verið gerðar breytingar á stimpilgjöldum á Alþingi um að skjöl tengd eignaryfirfærslu á loftförum,
minni skipum og kaupskipum séu undanþegin stimpilgjaldi og eru skip yfir 5 brúttótonnum einu
atvinnutækin sem enn bera stimpilgjald þegar eignaryfirfærsla á sér stað. Sjávarútvegurinn er
eina atvinnugreinin þar sem vinnutæki (fiskiskip) lúta þeim álögum að fyrir fjárfestingu nýrra
vinnutækja (fiskiskipa) þurfi að greiða stimpilgjöld og þekkist slík skattlagning hvergi á öðrum
Norðurlöndum. Sértæk gjaldheimta leggst nú þegar þungt á sjávarútveginn í formi
veiðileyfagjalda og ótækt að leggja enn frekari kvaðir á borð við stimpilgjöld á útgerðir ekki síst á
sama tíma og stjórnvöld hvetja til fjárfestinga sem leiða af sér umhverfisvænni skipakosti.
Sjávarútvegurinn er burðarás í atvinnulífi og hagkerfi Íslendinga og nauðsynlegt að stjórnvöld
leggi sitt af mörkum við að tryggja að nægur hvati sé til endurnýjunar, framþróunar og
nýsköpunar í greininni, en stimpilgjöld á fiskiskip geta seint talist til slíkra hvata heldur frekar
sem þröskuldur. Nýleg dæmi um loðnubrest sanna einnig enn og aftur að miklar sveiflur geta
orðið með stuttum fyrirvara í greininni sem geta haft verulega neikvæð áhrif á rekstrarskilyrði
fyrirtækja í sjávarútvegi. Með afnámi stimpilgjalda á fiskiskip geta stjórnvöld lagt sín lóð á
vogarskálarnar við að draga úr áhrifum slíkra sveiflna, auka samkeppnishæfni íslensks
sjávarútvegs og viðhalda jafnræði meðal atvinnugreina.
17. apríl 2019
Bæjarfulltrúar Sjálfstæðisflokksins í Vestmannaeyjum
Hildur Sólveig Sigurðardóttir, aðalmaður
Helga Kristín Kolbeins, aðalmaður
Trausti Hjaltason, aðalmaður
Eyþór Harðarson, varamaður
Margrét Rós Ingólfsdóttir, varamaður
Sigursveinn Þórðarson, varamaður