Athugasemdir við sviðslistalög
Bandalag íslenskra leikfélaga Athugasemdir við drög að Sviðlistalögum
Bandalag íslenskra leikfélaga fagnar framkomnum drögum að frumvarpi til laga um
sviðslistir og þakkar sérstaklega þann skilning sem þar kemur fram á mikilvægi
starfsemi áhugamanna í leiklist.
Okkur líst vel á að verða hluti af fyrirhugaðri kynningarmiðstöð sviðlista og vonum
að samlegðaráhrifin verði jákvæð, jafnt faglega sem og rekstrar- og félagslega.
Athugasemdir Bandalags íslenskra leikfélaga eru eftirtaldar:
Almennt:
Við teljum vissa hættu á að nýr milliliður milli okkar og ráðuneytisins, sviðslistaráð
sem við munum ekki eiga aðild að, taki af okkur ákveðið sjálfræði - sérstaklega þar
sem áformað er að ákvarðanir þess verði endanlegar á stjórnsýslustigi og sæti ekki
kæru til ráðherra.
Drög að frumvarpi til til laga um sviðslistir
17. gr. Sviðslistasjóður
Við teljum að úthlutun styrkja til aðildarfélaga Bandalags íslenskra leikfélaga vegna
verkefna þeirra sé best fyrirkomið með sama hætti og hingað til, þ.e. að stjórn þess
geri tillögur að úthlutun úr deild áhugamanna sviðslistasjóðs eftir þeim reglum sem
aðilar hafa komið sér saman um. Við höfnum alfarið afskiptum atvinnumanna af því
verkefni.
Um einstakar greinar frumvarpsins
Um 17 gr. bls 11:
Í lok þriðju málsgreinar er talað um Félag íslenskra leikfélaga, vinsamlegast breytið
því í Bandalag íslenskra leikfélaga.
Í sömu málsgrein er tiltekið hvaða skipting eigi að vera milli deilda í sviðslistasjóði.
Gæta þarf þess að að framlagið til áhugaleikfélaganna og skrifstofu Bandalags
íslenskra leikfélaga lækki ekki við þessa breytingu heldur verði tryggt að það hækki
árlega til samræmis við almennar hækkanir í landinu. Tryggt verði að framlög til
skrifstofu Bandalagsins sem hingað til hafa verið greidd samkvæmt 3ja ára samningi
í senn undanfarin 6 ár, séu tekin með inn í reiknireglur vegna sviðslistasjóðs - það
kemur ekki skýrt fram í frumvarpinu og skýringum með því.