Sálfræðingafélag íslands
(ICELANDIC PSYCHOLOGICAL ASSOCIATION)
Allsherjar og menntamálanefnd Alþingis
Reykjavík 4. september 2019
Efni: Athugasemdir Sálfræðingafélags Íslands (SÍ) vegna athugasemda Geðlæknafélags
Íslands (GÍ) frá 5.3.2019, um sálfræðiþjónustu í fangelsum, 137. mál.
Sí gerir athugasemdir við greinargerð Geðlæknafélags Íslands í heild sinni. Þar eru reifaðar hugmyndir um
heildstæða geðheilbrigðisþjónustu við fanga en í raun er um að ræða þingmál um aukið aðgengi að
sálfræðiþjónustu í fangelsum.
Í athugasemdum GÍ kemur einnig fram í 3ja kafla greinargerðar að: " Við leggjum til að mynduð verði teymi,
leidd af teymisstjóra sem er fagaðli (yfirlæknir og sérfræðingur í geðlækningum) með læknum úr
heilsugæslunni, geðlæknum, hjúkrunarfræðingum og geðhjúkrunarfræðingum, iðjuþjálfum, sálfræðingum og
félagsráðgjöfum. Stærstur hluti þjónustunnar ætti að vera íhöndum geðhjúkrunarfræðinga með reynslu í
sálfræðilegum meðferðum (þ.m.t. áfallameðferð með EMDR). Mestu skiptir þó að geðheilbrigðisþjónustan sé
rekin eins og hver önnur heilbrigðisþjónusta en ekki skilin frá henni.
Í umsögn GÍ kemur einnig sterkt fram að ákveðnar heilbrigðisstéttir eigi að sinna ákveðnum stöðum í
þessari þjónustu. Furðar SÍ sig á því að GÍ taki sérstaklega fram að geðhjúkrunarfræðingar ættu að sinna
sálfræðimeðferð og nefna dæmi um geðhjúkrunarfræðinga sem hafa reynslu af EMDR meðferð við
áföllum. Þar virðist GÍ mæla með að horft sé fram hjá heilli stétt sem hefur það að markmiði að vinna
sálfræðimeðferð. Vill SÍ árétta að mikilvægt er að velja fagfólk til starfa sem er hæfast hverju sinni, þ.e.
hafi bestu menntunina, reynsluna og þekkinguna fyrir hvert verkefni. Menntun sálfræðinga er byggð upp
til að geta sinnt sálfræðimeðferð. Að baki liggur 5 ára háskólanám, m.a. um geðraskanir og
sálfræðimeðferðir. Flestir sálfræðingar sem sinna áfallameðferð hafa hlotið sérstaka þjálfun og
handleiðslu í að veita gagnreyndar meðferðir við afleiðingum áfalla. Sálfræðingar eru stétt sem getur á
grundvelli menntunar sinnar unnið að kortlagningu vanda skjólstæðinga, unnið inngrip við vanda þeirra í
formi sálfræðimeðferðar og metið árangur meðferðar. Það er okkar sérhæfing og teljum það fráleitt að
vera ekki í fremstu röð heilbrigðisstarfsmanna sem sinna sálfræðimeðferð.
Tryggvi Ingason
Formaður
Sálfræðingafélag Íslands - Borgartúni 6 - 105 Reykjavík - s 595 5190 / 659 2636 - www.sal.is
sal@sal.is
http://www.sal.is/
mailto:sal@sal.is